Müasir dövrdə tədrisin dünya standartlarına uyğun olaraq qurulması, tədris prosesində tələbələrin bilik səviyyəsinin inkişafı və yoxlanılması yeni dərsliklərin və dərs vəsaitlərinin hazırlanması zəruriliyini ön plana çəkir. Eyni zamanda texniki universitetlərdə digər elmlərlə yanaşı fundamental elm kimi ali riyaziyyatın tam kursunun tədrisi bu sahəyə uyğun dərs vəsaitlərinin dətərtib edilməsinə əsas verir. Bu məqsədlə ali texniki universitetlərin tədris proqramları əsasında tərtib olunmuş «Ali riyaziyyat» (I hissə) dərs vəsaiti üç bölməni əhatə edən on beş fəsildən ibarətdir.
I fəsildə determinantlar və xətti tənliklər sistemi, II fəsildə koordinat sistemləri və analitik həndəsənin sadə məsələləri, III fəsildə vektorlar cəbri, IV fəsildə müstəvi üzərində düz xətt tənlikləri, fəzada düz xətt və müstəvi tənlikləri, V fəsildə ikitərtibli əyrilər və səthlər, VI fəsildə kəmiyyət, ədəd, dəyişən və funksiya, VII fəsildə kompleks ədədlər, VIII fəsildə limitlər nəzəriyyəsi və kəsilməzlik, IX fəsildə birdəyişənli funksiyaların diferensial hesabı, X fəsildə diferensial hesabının teoremləri, XI fəsildə törəmənin tətbiqləri, XII fəsildə çoxdəyişənli funksiyaların diferensial hesabı, XIII fəsildə diferensial hesabının həndəsəyə tətbiqi, XIV fəsildə qeyri-müəyyən inteqral, XV fəsildə müəyyən inteqral və onun tətbiqləri verilmişdir.
Kitabda təriflər, teoremlər, qaydalar səlis şərh edilmiş, müəyyən anlayışların fiziki mənası ilə yanaşı, həndəsi izahı da əyani olaraq şəkillərlə verilmişdir. Bütün fəsillərin sonunda çalışmaların həlli göstərilmişdir ki, bu da kitabı sərbəst öyrənməyə imkan yaradır.
