Nicat Məmmədov – Adsız kitab

Bu, sadəcə bir kitab deyil, insanın öz daxili qaranlığı ilə üzləşməsinin səmimi və ağrılı sənədidir. Müəllif (və ya daxildəki o Kölgə) oxucunu adların və maskaların itdiyi bir məkana dəvət edir. Burada Bilmək bir personaja çevrilir, zaman isə amansız bir hakimə. Gündəlik qeydlər şəklində irəliləyən mətn; sevgidən qaçışın mümkünsüzlüyünü, yalnızlığın psixologiyasını və Tanrı ilə olan o gizli bağın axtarışını mərkəzə qoyur. Sən bu səhifələri oxuyanda məni axtarma. Mən artıq buradayam, deyən müəllif, oxucu ilə daxili bir mən arasında güzgü tutur.
Söz. Bəli sözlər var lakin bu kitabın müəllifi yoxdur. Çünki adı olan hər kəs çoxdan ölüb. Qalan yalnız bir kölgədir: Sənin içində gizlənən, ən qaranlıq gecələrində ayıq qalan, ən böyük yalanını belə bilən kölgə. O kölgə səni məndən daha yaxşı tanıyır. Çünki o, boğazında düyünlənib qalan, Dilə gəlməyə cəsarət etməyən səsindir. Oxu. Bəlkə də bu kitabı elə sən özün yazmısan. Mən isə sadəcə sənin içində gizlənən kölgəyəm.