Fəxrəddin Qasımoğlu - Son Gecə

Hörmətli oxucu. Kriminal detektiv janrda ilk romanımı sizlərə təqdim edirəm. Əsər baş qəhrəmanın dilindən, sadə dildə yazılıb. Ara-sıra verdiyim yumor və satira ilə oxucunu darıxmağa qoymamışam. Süjet xəttini nə qədər maraqlı etməyə çalışmışamsa, romanın maarifləndirici, tərbiyəvi əhəmiyyətinə də bir o qədər yer vermişəm. Əsasən yeniyetmə və gənc nəslə hesablanmasına baxmayaraq, kitabın bütün yaşda insanlar üçün maraqlı olacağını düşünürəm. Sirr deyil ki, narkomaniya bir bəla olaraq yayılmaqda davam edir. Narkomaniya qədər təhlükəli olan daha bir bəla da var. Bu bəla-bəzi gənclərin, əslində heç mövcud olmayan, kimlərinsə uydurduğu “cinayət aləminin romantikası”na meyl etməsidir. İnsan, psixikasının formalaşması prosesində kənar təsirlərə daha həssas olur. Elə bu yaş dövründə olan yeniyetmələr adətən nəsihəti sevmir, ətraflarında olan, “dost” adlandırdıqlarının sözünü valideyin sözündən üstün tutur, onların təsiri altında istənilən addımı atmağa hazır olur, bunu bir növ özünütəsdiq hesab edirlər. Bir neçə yaş böyük olan həmin “dost”lar isə, onların bu zəifliklərini gözəl bildiklərindən, məharətlə istifadə edərək manipulyasiya edir, nəticədə cəmiyyət üçün gözəl bir fərd, vətəndaş olacaq yeniyetmə özü də fərqinə varmadan cinayət aləminə sürüklənir. Təəssüf ki, bir çox hallarda sonra gec olur. Kitabda mütəmadi olaraq istər narkomaniyanın, istər də ümumilikdə cinayət aləminin sonu qaranlığa aparan bir yol olduğuna misallar gətirirəm. Ancaq heç bir halda bunu təkidlə təlqin etməyə çalışmır, sadəcə bu yolun fəsadlarını açıqlayıram. Məncə təlqinin ən yaxşı üsulu elə budur. İnsana yaxşını və pisi göstərmək, sonra yaxşıya doğru kiçik bir təkan verərək kənara çəkilib öz seçimini etmək fürsəti vermək.
Azərbaycan polisinin fədakar fəaliyyətinin “görünməyən” tərəfləri barədə də oxucuları mümkün olan qədər məlumatlandırmağa, asayişimizin keşiyində duran bu peşə sahiblərinin həyatının gündəlik qayğılarla yaşayan sadə insanların həyatından nə qədər fərqləndiyi haqqında az da olsa, təsəvvür oyatmağa çalışmışam. Kitabdakı maarifləndirici məqamlar gənc nəslin tərbiyəsində azca da olsa rol oynayarsa, bunu böyük uğurum hesab edəcəyəm. Sizin xeyir-dualarınızla kitabın davamını yazmağı planlaşdırıram. Onu da qeyd etməyi borc bilirəm ki, ilk təcrübəm olduğu üçün, peşəkar qələm əhli olan dostlarım, səmimi insanlar, Azərbaycan Milli Konservatoriyasında İctimai elmlər kafedrasının müdiri, filologiya üzrə fəlsəfə doktoru Hacı Firudin Qurbansoy və peşəkar jurnalist, “Polis” qəzetinin baş redaktoru, polis mayoru Elşad Hacıyev dəyərli məsləhətləri ilə mənə çox kömək etdilər və nəticədə kitabın indi sizə təqdim olunan son variantı ərsəyə gəldi. Buna görə onlara minnətdaram. Müəllif olaraq, kitabımın hər bir oxucusuna təşəkkür edirəm. Qismət olarsa, növbəti kitabın “Ön söz”ündə görüşərik.